|
گذرے ویلے نیاں گلاں جنہاں بِچ سبق بی ہوندے
تحریر :اختر نعیم
|
|
کدی کدی گذرے ویلے تے نظر باندے آں تے اس ویلے مُچ ساریاں گلاں یاد آندیاں ہن۔ جنہاں بِچ سبق بی ہوندے۔
ہک اوہ ویلا بی آسا جدوں صوبہ سرحد بچ خان عبدالقیوم خان دی مشہوری آسی ہر کوئی خان قیوم نوں خوش رخدا آسا اس واسطے کہ خان قیوم اقتدار بچ آسا۔ خان قیوم مُچ سارے سیاست دانا دی سرپرستی بی کِیتی آسی ورے اوہ ویلا بی آیا جدوں مچ سارے سنگی اس کولوں جدا ہوگئے۔ اسی طراں 1980 دی دہائی بچ اس ویلے دے صوبہ سرحد دے فوجی گورنر فضل حق سُنڑ بی مچ سارے سیاست داناں دی سرپرستی کِیتی آسی ورے جدوں اوکھا ویلا آیا تے زیادہ تر سیاست داناں سُنڑ اس کولوں اکھیاں پھیر چھوڑیاں۔
دور نہ جُلو تازہ مثال پرویز مشرف دی اے کہ جدوں اقتدار آسا تے سارے اگے پِچھے پھردے آسے ورے جدوں اقتدار تو نکلیا تے اس دا کوئی سیاسی سنگی نال نہ آسا۔
اسی طراں دیاں مچ ساریاں مثالاں ہور بی ہن۔
آخدے ہن کہ سیاست بچ کوئی بی کسی دا نہی ہوندا۔ سیاست دان بی چنگے ویلے بچ آپڑیں مخلص سنگیاں نوں پُہل جُلدے ہن تے فر انجام تے اسی طراں دا ہوسی۔ اسی طراں دے ہور واقعات بی ہن جہڑے کہ اساں دے سامڑے گذرے جنہاں تے کدی کدی گل کتھ کردے رہساں۔
زیادہ دور نہ جُلدے نواز شریف تے عمران خان دا دور بی دیخو، ہر گل واضع ہوجُلدی اے۔
جدوں نواز شریف زیر عتاب آیا تے ہک ہک کرکے سارے سنگی اس کولوں دور ہوگئے۔ عمران خان اقتدار بچ آیا تے مُچ سارے اس نال ٹُر گئے تے جدوں اس دا اقتدار مُکیا تے ہک ہک کرکے مُچ سارے سنگی اُڈاری مار گئے۔
اسی کو سیاست آخدے ہن، ایہہ کوئی اہم گل نہی۔ اسی طراں ہوندا رہندے۔
حیرانگی دی گل ایہہ کہ عمران خان الیکٹبلز دے سہارے اقتدار بچ آیا، اوہ لوک ہٹ گئے تے عمران خان کَلا رہ گیا۔ ہونڑ اسی طراں نواز شریف نال بی ہوندا جُلدے تے مُکو ایہہ لگدے کہ اقتدار بچ اگر آگیا تے فِر بی پنج سال پورے نہیں کر سکدا، ایہہ سارا کُج سامڑے دِسدے ورے سیاست دان اکثر اقتدار توں بغیر نہی رہ سکدے۔ ایہہ نشہ اے جس کو لگ گیا اوہ اس دا اتنا عادی ہو جُلدے کہ جدوں اس کول اقتدار نہ ہووے تے اوہ مُچ ای کَرِی کور ہوندے
اقتدار جس کو نہی ملیا اوہ بی تَرَسدے تے جس کو ملدے تے اس توں بعد اوہ بی تَرَستا رہندے۔ مُچ کہٹ سیاست دان اس طراں دے ہوندے ہن کہ جہڑے اقتدار توں بعد چپ کرکے بیٹھ جُلدے ہن۔ انہاں دے چنگے تے فلاحی کَم ہمیشہ جیندے رہندے ہن۔
جدوں آئی جے آئی بنڑی آسی تے اس ویلے دے گورنر فضل حق سُنڑ کافی سارے سیاستداناں دی سرپرستی کِیتی آسی۔ بعد بچ آفتاب شیرپاؤ دی حکومت بنڑی تے آئی جے آئی دے تقریبا سارے پنج چھ کو چھوڑ کے شیر پاؤ کیمپ بچ چلے گئے آسے۔
فضل حق دا دورہ مانسہرہ ہویا تے کسی سوال کِیتا کہ جناب تُساں اُنہاں کو ٹکٹ کیوں دِتے کہ جہڑے تُساں کو چھوڑ گئے۔ جس تے فضل حق آخیا کہ ایہہ الیکٹیبلز آسے اس واسطے میں انہاں کو ٹکٹ دِتے بہرحال مڑے کولوں غلطی ہوگئی، میں انہاں دا ماضی نہی دیخیا کہ ماضی بچ انہاں دے بَڈیرے بی وفاداریاں بدلدے آسے۔
الیکٹیبلز کو نال ملانڑاں دی غلطی پہلے بی کئی رہنما کرچکے ہن تے ہونڑ ہک واری فِر نواز شریف اسی طراں دی غلطی کردے۔ انجام کہہ ہوسی صاف ظاہر اے۔
اس توں بہتر اے کہ میاں صیب اپوزیشن بچ بیٹھے تے کدی بی مخلوط حکومت نہ بڑاوے۔
سادہ اکثریت کہن کے اپوزیشن بِچ بیٹھنا دی ہک بڈی مثال ترکیہ دے مرحوم وزیراعظم بلند اِجویت دی سامڑے اے جس دا ہک بڈا مقام اس کو مِلیا۔
مضبوط اپوزیشن بچ رہ کے بی ملک دی خدمت ہوسکدی اے اگر کوئی کرنا چاہوے تے۔
|
|
|
